Catégorie : Actualités

D’Enseignanten aus de Grondschoulen aus der Regioun Dikrech haten d’Méiglechkeet, un enger spannender Formatioun iwwert d’Thema „Kënschtlech Intelligenz (KI)“ deelzehuelen. Initiéiert gouf dës Formatioun vun der Dikrecher Regionaldirektioun an Zesummenarbecht mam regionalen I-CN, dem Marc Kremer.

D’Zil war et, e Bewosstsinn fir d’Chancen an d’Erausfuerderunge vun der KI am Schoulalldag ze verschafen. D’Formatioun war a dräi Deeler opgedeelt:

Deel 1: Aféierung an d’KI
Am éischten Deel kruten d’Participanten d’Basiswëssen iwwert KI vermëttelt.

Deel 2: Praxis
Am prakteschen Deel konnten d’Enseignanten verschidde KI-Tools op diverse Statiounen ausprobéieren – vun Text- a Bilderstellung bis zu Unterréchtsvirbereedung mat KI.

Deel 3: Ëmsetzung um Terrain
Zum Ofschloss gëtt nach eng konkret Ëmsetzung um Terrain gemaach, déi kuerz dokumentéiert gëtt, inklusiv enger Reflexioun iwwer de Verlaf an de Resultater vun dëser Ëmsetzung.

Dës Formatioun huet éischt Ablécker ginn, wéi KI d’Enseignanten ënnerstëtze kann an hinnen sou erméiglecht, de Schüler wichteg Mediekompetenzen ze vermëttelen.

De 19. Juli, wärend der éischter Woch vun der Schoulvakanz, war et un der Zäit dass d’Regionaldirektioun, zesumme mat der Diagnostik Ekipp, der Schoulentwécklungsekipp aus der Dikrecher Regioun an de Schoulpresidenten, sech emol een entspaanten Dag als Ofschloss vum Schouljoer 2023/24 gënnen. Wéi mécht een dat am Beschten? Natierlech bei dësem herrleche Wieder dobaussen an der Natur. 

Och dëst Joer war d’Thema eng Marche gourmande, mee dës Kéier duerch déi wonnerschéi Gemeng Veianen. Op engem Parcours vu ronn 10 km, konnt jiddereen déi wonnerschéi Landschaft lanescht d’Our an d’Veianer Schlass genéissen an dobäi op verschidde Statiounen e gudde Maufel iessen. 

Mir wënschen iech all eng schéi Vakanz! 

Wëllkomm eisen 12 neie Fonctionnaire-Stagiairen an der Direktioun Dikrech.

D’Dikrecher Regionaldirektioun huet och dëst Joer d’Stagiaire-Fonctionnairen an hir jeeweileg Conseillers pédagogiques op eng Receptioun an d’Gebailechkeete vun der Direktioun zu Dikrech invitéiert, fir hinne fir hir aussergewéinlech Aarbecht an den erfollegräichen Ofschloss vum Stage ze gratuléieren. Am Schouljoer 2023-24 hunn 8 Stagiairen hire Stage an de Schoule vun der Regionaldirektioun Dikrech absolvéiert a ginn dës Woch vum Minister Claude Meisch vereedegt.

D’Direktioun seet de Stagiairen an natierlech och hire Conseilleren e grousse Merci fir hir engagéiert Aarbecht a wënscht hinne vill Erfolleg an hirer weiderer Schoulkarriär.

Flotten Ofschloss mat der ganzer ESEB Ekipp an der Dikrecher Regionaldirektioun. No der Ofschlossreunioun vum Schoulojoer 2023/24 gouf et nach e Patt zum beschten op der Terrass vun der Direktioun zu Dikrech.

Wéi an alle Beruffer kënnt och am Enseignement iergendwann de Moment, wou et Zäit ass, den Hummer un de Nol ze hänken an sech no joerzéngtelaang Aarbecht op déi wuelverdéngte Pensioun virzebereeden. Dëse Moment ass och nom Schouljoer 2023-24 fir 8 Enseignanten aus der Regioun Dikrech endlech komm. D’Direktioun hat dowéinst d’Éier op e kléngen Empfang anzelueden an hinnen hir häerzlechst Wënsch fir eng roueg an erfëllend Pensioun auszedrécken. Zesumme mat hire Schoulpresidenten an der Direktioun gouf den 8 Juli op e neit Kapitel an hirem Liewen ugestouss.

10 000 Euro Scheck vun de Schüler aus dem Kuebebongert

Erléis vum Sponsored Run fir d‘ Amicale vun der Schoul fir Assistenzhonn

Et gehéiert scho säit Joren zur schéiner Traditioun, dat d’Schoulkanner aus dem Kuebebongert vu Feelen mat hire Léierbeoptragten e puer Deeg virum Schoulofschloss, e Scheck fir engt gut Wierk weidergin. Viru kuurzem war et nees e souwäit, wou d‘Kanner aus de Cycle 1-4 den Erléis vum Sponsored Run am Kader vum Ofschloss vun der Schoulsportwoch vum 3. Juni, wou si fir all gelaafe Ronne gesponsort gi sin, a mat voller Kraaft vill Kilometer absolvéiert hun. Ganz stolz konnte sie all zesummen e Scheck vun 10 000 Euro un Madame Nelly Nash, verbonne mat engem oprichtige Merci iwwerginn, den der „ Amicale vun der Schoul fir Assistenzhonn“ zugut könnt. Mat konkrete Beispiller konnt de Mupp vun der Rass Golden Retriever de Kanner beweisen, wat hien an der Praxis fir d’Läit mat enger Behënnerung alles maache kann.

Charles Reiser (photo)

Article MyWort

Article RTL

Viru kuerzem gouf d’Schoul Koudyiri zu Koudougou am Burkina Faso a Betrieb geholl.

D’Grondschoul vun Tandel huet dëse Projet mat engem Don vun 16790 Euro un d’ONG „Le soleil dans la main“ co-finanzéiert.

E grousse Merci geet nach eemol un d’Kanner an hir Donateuren aus der Tandeler Gemeng.

Si hunn dës generéis Spend mat engem enormen Exploit während engem Spendelaf zum Ofschloss vun der Tandeler Sportswoch am Mee 2023 erméiglecht.

Crédit photo: Le soleil dans la main

E Mëttwoch, den 27. März 2024, konnten déi Schierener Schoulkanner, zesumme mat hirem Léierpersonal an a Presenz vun der Madamm Vicky Witry aus der Schouldirektioun Dikrech e Scheck vun 1000 Euro un d’Associatioun “Île aux clowns “ iwwerreechen.  – www.ileauxclowns.lu

Dës Zomm ass en Deel vum Erléis vum Chrëschtmaart am Dezember 2023.

D’Vertrieder vun der Associatioun « Île aux clowns » hunn de Schoulkanner virun der Scheckiwwereechung hir Aarbecht vrigestallt.

E grouse Merci un d’Madmm Philipp an den Här Anselin vun der Associatioun « Île aux clowns «  fir de flotten Virtrag.

Ee grousse Merci geet u jiddereen deen eis bei eise Fester ënnerstëtzt an domadder dëse Scheck méiglech gemaach huet.

Giuseppina Leone – Presidentin Schoulkommitee

Enormen Erfolleg vun de Schierener a Bettenduerfer Schoulen zu Antwerpen an der Finall vun der BeLux FIRST LEGO League!!

Den 23 Mäerz gouf am Sportpaleis zu Antwerpen déi grouss Finall vun der BeLux FIRST LEGO League ofgehalen, mat der bemierkenswäerter Deelnam vu fënnef Lëtzebuerger Ekippen. Iwwer déi lescht Wochen a Méint hu ronn 400 Equippen aus béiden Natiounen an der Liga konkurréiert, mat de 23 stäerksten Ekippen, déi sech duerch verschidde regional a national Evenementer fir d’BeLux Finall qualifizéiere konnten.

Mat vun der Partie dëst Joer waren d’Schoule vu Schieren a Bettenduerf! Dobäi konnt sech d’Team Lego Knuffs vu Schieren sensationnell de Champions Award fir déi bescht Gesamtleeschtung sécheren! Hir kreativ Problemléisungskompetenz huet zum Haaptgewënn vun der prestigsräichsterTrophäe vum Concours gefouert. D’Team Lego Knuffs huet en innovativen App-Prototyp entwéckelt, déi blanne Persounen duerch akustesch Beschreiwungen Danzbeweegunge méi no bréngen. Dës Applikatioun transforméiert eng opgehollen Danzsequenz a verbalen Instruktioune, sou datt d’Choreographie auditiv iwwermëttelt an nogetanzt ka ginn. Duerch eng Opnam vun der Tanzausféierung duerch eng blann Persoun bitt d’App personaliséierte Feedback zur Danzperformance.

Och d’Team Lux City vu Bettendorf huet mat sengem Engagement a Teamgeescht iwwerzeegt, wat mam Motivate Award belount gouf. Hir Yogaübunge während der Erëffnungsfeier waren een absoluten Highlight an eng flott Ofwieselung fir de ganze Publik am Sportpalais.

D’Dikrecher Regionaldirektioun gratuléiert deenen zwou Ekippe fir dëse super Exploit a wënsche fir Spaass an Erfolleg bei hire nächste Projeten!