Catégorie : Actualités

D’Dikrecher Regionaldirektioun huet och dëst Joer d’Stagiaire-Fonctionnairen an hir jeeweileg Conseillers pédagogiques op eng Receptioun an d’Gebailechkeete vun der Direktioun zu Dikrech invitéiert, fir hinne fir den erfollegräichen Ofschloss vum Stage ze gratuléieren. Am Schouljoer 2024-25 hunn 10 Stagiairen hire Stage an de Schoule vun der Regionaldirektioun Dikrech absolvéiert a ginn dës Woch vum Minister Claude Meisch vereedegt. Niewent de Stagiairen an der Fonctionnaireskarriär kruten och 15 Stagiairen an der Employéskarriär e Patt fir op hiren Ofschloss vum Stage unzestoussen.

D’Direktioun seet de Stagiairen an natierlech och hire Conseilleren e grousse Merci fir hir engagéiert Aarbecht a wënscht deenen neien Enseignante vill Erfolleg an hirem neie Beruff.

Wéi an alle Beruffer kënnt och am Enseignement iergendwann de Moment, wou et Zäit ass, den Hummer un de Nol ze hänken an sech no joerzéngtelaang Aarbecht op déi wuelverdéngte Pensioun virzebereeden. Dëse Moment ass och nom Schouljoer 2024-25 fir 8 Enseignanten aus der Regioun Dikrech endlech komm. D’Regionaldirektioun hat dowéinst d’Éier op e kléngen Empfang anzelueden an hinnen hir häerzlechst Wënsch fir eng roueg an erfëllend Pensioun auszedrécken. Zesumme mat der Direktioun gouf den 7. Juli op e neit Kapitel an hirem Liewen ugestouss.

Den 30. Juni huet d’Veianer Schull op hiert järlecht Schoulfest agelueden. Fannt dozou een Text vum Philippe Hermann, Veiner Schoulpresident, am MyWort Artikel. (Fotoen: Jengel Klasen)

Spannende Nomëtten zum Thema Sprooch mam Prof. Dr. Claudio Nodari

Den 22. Mee konnte mir de Prof. Dr. Claudio Nodari, renomméierte Sproochwëssenschaftler aus der Schwäiz bei eis zu Dikrech begréissen. Am Kader vun der Formatioun „Von der Sprachforderung zur Sprachförderung“ , déi mir zesumme mam IFEN ( www.ifen.lu ) am Ciné Scala an an der Aler Seeërei organiséiert haten, huet eise Gaascht vun Zürich den Enseignanten aus eise Grondschoulen interessant Weeër opgewisen, wéi ee mat Succès Kanner a méisproochege Kontexter an enger Sprooch ka viru bréngen. Uschléissend un dës Veranstaltung huet d’Léierpersonal lo d’Méiglechkeet, sech am Beräich vu SIMS (Sprachförderung in Mehrsprachigen Schulen) duerch zousätzlech Formatiounen, déi fir d’Schoulen an der Regioun Dikrech organiséiert ginn, virun ze bilden.

E grousse Merci geet un d’Participanten, d’Gemeng Dikrech, de Ciné Scala an natierlech un de Claudio Nodari fir säin engagéierte Bäitrag.

Den 24. Abrëll hunn sech op Invitatioun vun der Dikrecher Regionaldirektioun am Festsall zu Schieren Vertrieder aus de Lycéeën wéi och d‘Enseignanten aus dem Cycle 4.2 aus der Regioun Nordstad zesummefonnt, fir sech iwwer d’Schouloffer am Enseignement secondaire auszetauschen.

Nieft dem Léierpersonal aus dem Cycle 4.2 waren och Vertrieder vum LCD, vum LTETT, vum LTA, vum Nordstad-Lycée an och vum Lycée Sainte-Anne präsent, fir hir jeeweileg Schouloffer virzestellen. Am Uschloss haten d’Enseignanten d’Méiglechkeet, Froen ze stellen a sech op de Stänn vun de Lycéeën nach weider z‘informéieren.

Zum Ofschloss huet d’Gemeng Schieren, déi frëndlecherweis hire Festsall zur Verfügung gestallt huet, op e klenge Patt invitéiert.

D’Dikrecher Regionaldirektioun seet der Gemeng Schieren, de Vertrieder vun de Lycéeën an den Enseignanten aus dem Cycle 4 e grousse Merci fir de gelongenen Nomëtteg an déi gutt Zesummenaarbecht.

Déi éischt Enseignanten, déi aktiv a Kontakt mam Projet Alphabétiséierung op Franséisch wäerte kommen, sinn eis Enseignanten aus dem Cycle 1.

Ab dem Schouljoer 2026/2027 wäerten si d’Elteren dobäi ënnerstëtzen, eng informéiert Wiel fir hiert Kand ze treffen: geet et an d’Alphabétiséierung op Franséisch oder weiderhi wéi gewinnt op Däitsch?

Well dat eng ganz nei Approche duerstellt, huet d’Regionaldirektioun vu Dikrech an Zesummenarbecht mat den I-DSen den 24. Abrëll d’Titulairen aus dem Cycle 1 zesummegeruff, fir si op déi nei Erausfuerderungen virzebereeden.

Am Laf vum Nomëtten haten d’Enseignanten d’Geleeënheet, Froen ze stellen an zesumme mat der Direktioun Iddien auszetauschen, wéi de Projet an Zesummenaarbecht mat der Schoul kéint ëmgesat ginn.

Et war e ganz konstruktive Moment, mat ville spannende Perspektiven a frësche Iddien.

Den 23. Abrëll 2025 huet sech d’Ekipp vum Diagnostic vun der ESEB aus der Dikrecher Regionaldirektioun am Mariendall zesummefonnt, fir e ganzen Dag un engem neie Konzept an un enger neier interner Prozedur ze schaffen. Zil dovun war et, d’Effikassitéit vum Zesummeschaffe an déi intern Struktur, an Zesummenarbecht mam CI Sekretariat weider ze verbesseren.

Et war e ganz konstruktiven Dag, mat villen interessante a wäertvollen Iddien aus der ganzer Ekipp. Heiansdo brauch et een Tapéitewiessel, fir nees frësch Iddien ze entwéckelen.

Den 13. Mäerz huet d‘Dikrecher Regionaldirektioun (DR14) an Zesummenaarbecht mat den I-DSen an dem I-CN vun der Equipe „Développement scolaire“ vum IFEN ee Nomëtteg voller Austausch a Reflexioun iwwert d’Begleedung vu Kanner mat sozio-emotionalem Förderbedarf organiséiert.

D’Ouverture vum Nomëtteg gouf vun der Madame Nathalie Heftrich, Directrice adjointe vun der Dikrecher Regionaldirektioun, gemaach. Si huet d’Wichtegkeet vun enger gemeinsamer, strukturéierter a koordinéierter Approche ervirgehuewen, fir d’Kanner an enger sozio-emotionaler Vulnérabilitéit optimal z’ënnerstëtzen.

De Programm vum Nomëtteg bestoung aus dräi groussen Deeler:

1.       Zwee Keynote-Exposéen:

« ETEP als eng gemeinsam Sprooch a gemeinsam Approche fir eng staark Schoulgemeinschaft » vum Cathy Peiffer (I-EBS an der Grondschoul zu Colmer-Bierg) a Caroline Bous (I-EBS an der Grondschoul zu Veianen). Si hunn de Projet ETEP virgestallt, e pädagogescht Konzept, dat gezielt op d’Besoine vu Kanner mat Verhalensopfällegkeeten oder sozio-emotionalen Defiziter ageet, an och fir eng systematesch Förderung vun de soziale Kompetenze gëeegent ass.

« Köpfchen statt Chaos: Exekutive Funktiounen als Schlüssel zum Lernerfolleg » presentéiert vum Christian Treinen, Pädagog vum Service Diagnostik vun der ESEB an der Dikrecher Regionaldirektioun. Hien huet de Stellewäert vun den exekutive Funktiounen als entscheedende Faktor fir de Léier-Erfolleg vun de Schüler beliicht.

2.       Interaktiv Ausstellung:

Animéiert vun den Membere vun der ESEB-Assistance-Ekipp an den I-EBSen: All Schoul aus der Dikrecher Regioun konnt hei hir verschidde pädagogesch Konzepter an Tools virstellen, fir e favorabelt Léierëmfeld ze schafen, besonnesch fir Kanner mat Verhalensopfällegkeeten.

3.       Praktesch Reflexioun a Conclusioun:

Zum Ofschloss gouf et eng kleng Aufgabestellung, bei där d’Participanten hir Iddien a praktesch Erkenntnisser vum Nomëtteg ausgetosch hunn.

Bei engem ofschléissende Patt, offréiert vun der Gemeng Housen, gouf et nach eng Kéier d’Méiglechkeet, den Austausch an engem entspaanten Ambiente weiderzeféieren.

D’Dikrecher Regionaldirektioun seet e grousse Merci un all d’Mataarbechter, déi zum Succès vun dësem Dag bäigedroen hunn: dem IFEN fir d’Hëllef bei der Virbereedung an der Emsetzung, den I-EBSen Caroline Bous a Cathy Peiffer, dem Christian Treinen, ESEB-Pädagog, fir hiere gelongenen Virtrag, , all den I-EBSen an all de Memberen vun der ESEB aus de Schoulen an der Dikrecher Regioun fir hier immens flott Stänn an hier Bereetschaft hier Erfarungen an hieren Know-How ze deelen, all de Enseignanten fir hieren Interessi an hier Bereetschaft sech mat op de Wee ze maachen an  natierlech der Gemeng Housen fir hiren häerzlechen Empfang an hir logistesch Ënnerstëtzung. Dës pädagogesch Foire huet d’Wichtegkeet vun der Zesummenaarbecht a vun enger gemeinsamer Approche zur Begleedung vu Kanner mat sozio-emotionalem Förderbedarf bestätegt an nei Perspektive fir zukünfteg Initiativen an der Educatiounsgemeinschaft opgemaach.

« Alphabétisation en Français – Zesumme wuessen »

Ënnert der Moderatioun vum Simone Poss an dem Thomas Berliner hunn sech den 11. Februar d’Presidenten aus de Schoule vun der Dikrecher Regioun zesumme mat der Direktioun getraff, fir sech iwwert de Projet « Alphabétisation en Français » auszetauschen. Dës war eng wichteg Geleeënheet, fir gemeinsam Iddien ze entwéckelen an éischt konkret Virschléi fir d’Ëmsetzung vum Projet ze erarbechten.

De ganzen Nomëtteg iwwer haten d’Schoulpresidenten d’Méiglechkeet, hir Meenungen, Erfarungen a méiglech Bedenken anzebréngen, fir de Projet an de kommende Joren optimal an hirer Schoulrealitéit ze verankeren.D’Regionaldirektioun vun Dikrech freet sech besonnesch iwwer d’oppent an engagéiert Matschaffe vun de Schoulpresidenten an hir Bereetschaft, dëse wichtege Projet mat Éiergäiz an hirer Schoulgemeinschaft ëmzesetzen.